سواد الدنيا بقي حواليك
محدش بص جوا عنيك
ولاحظ لونهم الدبلان
بتعزف بالدموع وجعك
و بتعاتب في كام إنسان
محدش جه و خد بإيدك
وطيب خاطرك المكسور
بهت لونك على الأحزان
وبتقلل خروج و ظهور
بقيت بتخاف تشوف النور
يعري الجرح للأيام
بتهرب من سؤال مالك
بعادي مفيش و رايح انام
هروبك للأغاني سعات
وضحكك مغطي بية كدمات
سكوتك اللي صوت وجعه
بيزعج راحه الأموات
جرحك من الصديق اياه
وحب اترد لك معاناه
و تنهيدة بنفس مكتوم
وتطلع منها كده مهزوم
حياه بتعيشها من بره
مجرد شاشه على التليفون
بتستنى في حجات متجيش
مكانك لسا مابتمشيش
سواد الدنيا بقى حوليك
في وسط الزحمة غاوي سكوت
كئابة و حزن ماليه عينيك
بقيت تتمنى امتى تموت
عايش على الجرح مابتنساش
في اوضة بتشبه الأنعاش
راسم جواك ظلام و دموع
بقيت تقول للفرح بلاش
طلعت من الفات فاضي
بلاش الجاي يبقى مفيش
حياتك عيشها كده راضي
بس المهم ان انت تعيش
